त्याची माझी अगदी लहानपणापासूनची ओळख. तो आमचा सलून मधला कायमचा कस्टमर. गोड गोंडस मुलगा. गोरा गोरापान. पांढराशुभ्र. त्याच्या आईवडिलांसारखा. किती विनम्र !!! त्याचं नाव राकेश. त्याला दुकानात सोडलं कि सूचना मिळे , " याचे केस बारीक करुन टाका. कट मारताना नवीन ब्लेड वापरा. " आम्ही प्रत्येकाला नवीनच ब्लेड वापरतो. पण त्यांच्या घराकडून ब्लेड पाठवले जात असे. या राकेशच्या केसात फणी घातली रे घातली की तो रडू लागे. तो नाजूक होता , पण त्याच्या डोळ्यांत एक विलक्षण चमक दिसायची. साधा , सरळ मुलगा. शाळेतही नेहमी चांगल्या गुणांनी पास होत पुढे जाणारा.
या मुलाच्या पालकांचे आमच्यावर अनेक उपकार झाले आहेत. आम्ही लहान असताना त्यांची आदर्श वर्तणूक आम्हाला चांगलं वागण्याची प्रेरणा देत आली आहे.
हा मुलगा नंतर मोठा झाल्यानंतर भेटला तो कलाकार झाल्यानंतरच. त्याच्याशी संवाद साधताना माझाही आनंद वाढत जाताना दिसे. तेव्हाचा तो निरागस राकेश , आताही तितकाच निरागस वाटत होता. त्याचं बोलणं , आदर देणं हे सगळं अगदी जसंच्या तसं !!!
आता आज तो एका बड्या प्रिंटिंग प्रेसचा मालक आहे. कोणताही बडेजाव नाही. शांत , संयत व्यक्तिमत्त्व. आता त्याचं व्यक्तिमत्त्व अधिक कोरीव लेण्यासारखं कोरलं गेलेलं. त्याच्या ऑफिसमध्ये गेलो होतो. त्यानं आदरपूर्वक स्वागत केलं. बसायला सांगितलं. एका सुंदर आलिशान अशा वातानुकूलित कार्यालयात बसलेला राकेश मला लहानपणी सारखाच भासला.
त्यानं मला त्याच्या एका कार्यक्रमाला बोलावलं होतं. मी जाऊ शकलो नाही याची खंत मी त्याला उघडच बोलून दाखवली. त्याने आपल्या मोबाईलमधून एक बाईचा फोटो काढून दाखवला आणि ओळखण्यास सांगितले.
फोटोतली बाई माझ्या ओळखीची नव्हती. मी एकदा दोनदा नव्हे तीन चार वेळा त्याच्याकडे बघत राहिलो. तो त्याचाच फोटो होता. तो राकेशच होता. स्त्रीच्या वेशात त्याला ओळखणं खरंच अवघड गोष्ट होती. मी तो फोटो माझ्या बाबांनाही दाखवला. बाबा त्याला ओळखू शकले नाहीत. मी त्यांना हा राकेशचा स्त्री अवतार आहे असे सांगितले. तो सपशेल स्त्रीच दिसत होता , एवढी जबरदस्त वेशभूषा त्याने केली होती. असा हा राकेशावतार. याचा आज वाढदिवस आहे. त्याला वाढदिवसाच्या लेखरूपी शुभेच्छा.
©️ प्रवीण अशितोष कुबलसर ( 9881471684 )
No comments:
Post a Comment