🛑 बबलू , तू लगता है डब्लू

🛑 बबलू , तू लगता है डब्लू

          लहानपणी मी त्याला ' बबलू , तू लगता है डब्लू ' असे मी कायम चिडवायचो. गंमत करायचो. असं म्हटलं तो कसा मिश्किल हसायचा. आता हा बबलू भला मोठा भाचा झाला आहे. तो नोकरीही करतो. मोठा झाला असल्यामुळे फोन करत नाही. तो म्हणतो , " पप्पा , मम्मी यांच्याकडून खुशाली समजते , त्यामुळे वेगळा कशाला फोन करायचा ? " त्याचेही बरोबर आहे. कामाच्या व्यापात हल्ली मुलांना वेळ तरी कुठे मिळतो. नाही का ? तो फोन करत नाही , पण मी तरी त्याला कुठे करतो फोन !!! आता व्हाट्स अँप आले आहे ना ? त्याद्वारे संवाद होतात कधीतरी वर्षाने. 

          या बबलूचे नाव आम्हीच ठेवले. ' प्रणिल ' किती छान नाव आहे. त्यालाही ते आवडत असेल. लहानपणी मोठा भाचा साईश आणि हा दोघे आमच्याकडे आले होते. तेव्हा आम्ही गांगो वाडी येथे सावंतांच्या घरात राहत होतो. शेजारी एक भवानी मंदिर होते. त्या मंदिरात हे दोघेही मस्त मजेत खेळत होते. मी त्यांच्या मागे मागे धावत होतो. ते पडतील म्हणून त्यांना सांभाळत होतो. पण दोन्ही भाचे एवढे चपळ होते की मला अजिबात सापडत नव्हते. त्यांनी मला दमवून टाकले होते. मी घामाघूम झालो होतो. 

          त्यांना सारखे बाबासूट घातले आणि माझ्या कॅमेऱ्यात फोटो काढला. त्यात ते अगदी सारखेच दिसत होते. लहानपणी मुलं किती गोंडस दिसतात नाही , अगदी तशीच. 

          आता हा बबलू खूप समंजस झाला आहे. त्याच्या अनेक महत्त्वाकांक्षा आहेत. त्याला खूप फिरायचे आहे. त्यासाठी त्याने स्पोर्ट्स बाईक घेतली. ती महागडी आहे. त्यावर बसला की तो भारीच दिसतो. त्याला संपूर्ण भारत फिरायचा आहे. तो मला एकदा म्हणाला , " मी कन्याकुमारीला जाणार " फिरल्यामुळे खूप काही शिकता येते. लोकांचा अभ्यास करता येतो. आम्हाला आपली भीती वाटते , कारण आम्ही कधी अशी हटके महत्त्वाकांक्षा बाळगली नाही. त्याची महत्त्वाकांक्षा तो पूर्ण करीलही. आताची पिढी खूप शार्प आहे. ते जे ठरवतात ते करण्यासाठी काहीही करतील. 

          आम्ही आपलं त्याला नोकरी , खोली आणि छोकरी स्वतःच्या हिमतीवर मिळवण्यासाठी सांगत राहतो. तो आमचं ऐकतोही. शेवटी त्याचं जीवन हे त्याचं स्वतःचं आहे. ते कसं मजेशीर जगावं हा त्याचा प्रश्न आहे. तो नक्की चांगलं करत आहे ,आणि यापुढे अजून अधिक चांगलं चांगलं करत राहील याबद्दल खात्री आहे. त्याचं काही चुकत असेल तर त्याचे त्यालाच समजेल इतका तो शहाणा नक्कीच आहे.  त्याला मी मामा आहे म्हणून वेगळं काही सांगायला पाहिजे असे मला अजिबात वाटत नाही. एवढं मात्र खरं आहे , माझे भाचे आम्हांला कधीच उलट उत्तर करणार नाहीत.

          प्रणिलने आपल्या आयुष्याची यशाची शिखरे चढत असताना तो खूप खूप मोठा होत राहावा आणि त्याने योजलेली सर्व कामे होत राहोत अशी त्याला वाढदिनी शुभेच्छा. 

©️ प्रवीण अशितोष कुबलसर  ( 9881471684 )