🛑 आवाजाचा राजा

🛑 आवाजाचा राजा

          आवाज ही निसर्गाने आपल्याला बहाल केलेली देणगी आहे. त्यात प्रयत्नाने रियाज करुन आवाजासाठी प्रसिद्ध होताना मी खूप कमी लोकांना पाहिले असेल. 

          हा आवाज ऐकत राहावासा वाटला पाहिजे. आवाज ऐकून कार्यक्रमातून उठून जात असलेले लोक थांबले पाहिजेत. केवळ या माणसांचा आवाज ऐकण्यासाठी काही आवाजप्रेमी लोक कार्यक्रमाच्या शेवटच्या पुष्पापर्यंत थांबलेले असतात. ज्या कार्यक्रमाचे सूत्रसंचालन असे व्यक्ती करतात , त्यांच्या मुखातून येणारे शब्द टिपून घेण्यासाठी माझ्यासारख्या व्यक्ती टपून बसलेल्या असतात. हे आवाजाचे बादशहाच असतात. त्यांना कोणतेही शब्द द्या , त्या शब्दांना उच्चारांचं सामर्थ्य देणारे ते एक आवाजदूत असतात. काहीही म्हणा म्हणूनच मला अशा व्यक्ती देवदूत वाटत राहतात. 

          असे हे आवाजाचे राजा मला भेटले. त्यांचे नाव राजेश कदम. खरंच आवाजाचे बादशाहाच म्हणालात तरी ते वावगे ठरु नये. भेटीतून त्यांच्यातील सुत्रसंचालक पाहून कोणालाही भुरळ पडेल. माझेही तसेच झाले. एक माझ्यासारखा शिक्षक इतकं चांगलं बोलू शकतो याचा मला नेहमीच सार्थ अभिमान वाटतो. मी त्यांचे अनेक कार्यक्रम पाहिले , ऐकले आहेत. त्यांच्या आवाजाची जादू प्रत्येक श्रोत्याला भुरळ पाडेल अशीच आहे. 

          त्यांच्या आवाजासमोर पार्श्वसंगीत लाजेल. त्यांची बोलण्याची एक आगळी आणि वेगळी शैली आहे. त्यांनी त्याची निरंतर जोपासना केली आहे. या आवाजाचा त्यांना अभिमान असला तरी गर्व मात्र अजिबात नाही. त्यांच्या या कार्यामुळे त्यांना अनेक पुरस्कार मिळणे हे साहजिकच आहे. कितीही पुरस्कार मिळाले तरी त्यांनी आपले पाय जमिनीवरच ठेवले आहेत. पुढील आयुष्यात त्यांनी अनेक उत्तम पुरस्कार मिळवत राहावेत. त्यांना पुरस्कार मिळाला की तो पुरस्कारच मोठा होतो. 

          राजेश कदमांमध्ये दम आहे , ते कधी दमत नाहीत. त्यांनी आपली शैक्षणिक आणि व्यावसायिक पात्रता वाढवत नेली आहे. सध्या ते डॉक्टरेट मिळवण्यात व्यस्त आहेत. ते एक उत्तम कवी आणि लेखक आहेत. त्यांच्यासारखे लेखक ज्यावेळी माझ्या लेखनाला दाद देतात त्यावेळी आमचा साहित्यिक व्यासंग वाढण्यास प्रेरणा मिळत जाते.

          ते कधीही कुठेही भेटले की जे स्मितहास्य करतात , ते पाहून कोणीही आपले दुःख विसरुन जाईल. त्यांच्याही जीवनात अनेक विघ्ने आली असतील , पण त्यांनी आपल्या कर्तृत्वाच्या जोरावर त्यांवर सदैव मात केली आहे. आमच्यावर आपल्या तेजस्वी आवाजाचा ठळक ठसा उमटवणारे आमचे मित्र राजेश आम्हाला कायमच वंदनीय , आदरणीय असणार आहेत. 

©️ प्रवीण अशितोष कुबलसर ( 9881471684 )