काही माणसे कल्याण करण्यासाठी जन्माला येतात. नाभिक समाजाचे कल्याण करण्यासाठीही काही व्यक्तींचा जन्म झाला. अशा नाभिक जमातीचे सदैव कल्याण करण्याचा विचार करणारे आपल्या नाभिक समाजाचे राज्यपातळीवर कार्य करणाऱ्या नेत्याचे नावही कल्याण असावे हासुद्धा दुग्धशर्करा योगच म्हणायला हवा. शिवाजी महाराजांच्या काळात घोडदळ , पायदळ असे सैन्य असे. दळे आडनाव म्हणजे एक प्रकारचं आमच्या नाभिक समाजाच्या समस्या सोडवणारे दलच आहे असे म्हटले तरी वावगे ठरु नये. एव्हाना मी कोणाबद्दल बोलतोय हे वाचकांच्या लक्षात आले असेलच. हो बरोबर !!! मी आपल्या महाराष्ट्र नाभिक महामंडळाचे अध्यक्ष मा. कल्याणराव दळे यांच्याबद्दल बोलतोय.
नुकतीच त्यांची इतर मागास व बहुजन समाज संघटनेच्या कार्याध्यक्ष पदी अभिनंदनीय निवड झाली आहे ही आमच्या नाभिक संघटनेसाठी अत्यंत अभिमानास्पद गोष्ट आहे. त्यांनी यापूर्वीही अनेक राजकीय आणि संघटनात्मक उच्चस्तरीय पदे उपभोगली आहेत.
दोन वर्षांपूर्वी कणकवली येथे झालेल्या सिंधुदुर्ग जिल्हा नाभिक संघटनेच्या वधु वर मेळाव्यासाठी मा. दळेसाहेब अध्यक्षस्थानी विराजमान झाले होते. तेव्हा त्यांची प्रत्यक्ष भेट घडली. त्यांनी केलेले अध्यक्षीय भाषण म्हणजे वक्तृत्वाचा एक उत्कृष्ट नमुना ठरावा. त्यांचे व्यक्तिमत्त्व आमच्यासारख्या सर्वसामान्य कार्यकर्त्याला भुरळ पाडेल असेच आहे. त्यांनी मांडलेले मुद्दे व त्यांचे स्पष्टीकरण प्रत्येक वाक्याला टाळ्या घेणारेच होते. नाभिक समाजाचा समूळ विकास व्हावा यासाठी त्यांची तळमळ त्यांच्या भाषणात दिसून येत होती. त्यांनी आपल्या भाषणात नाभिक जमातीच्या अनेक विषयांना स्पर्श केला.
आता ते एका मोठ्या संघटनेचे कार्याध्यक्ष झाले आहेत. त्यांच्या मनात नाभिक समाजाबद्दल अनेक संकल्पना असतील , योजना असतील , त्या अंमलात येण्यावर त्यांचा नक्कीच भर असेल. ते एखादी गोष्ट करण्यासाठी प्रयत्नांची पराकाष्ठा करताना दिसतात. त्यांचे राज्यस्तरीय पुढारपण आमच्या तळागाळातील समाजासाठी दिलासा देणारे ठरणार यात तिळमात्र शंका बाळगण्याचे कारण नाही.
आमच्या सिंधुदुर्ग जिल्ह्यातील नाभिक बांधवांसाठी मा. कल्याणराव दळेसाहेबांच्या रुपाने एक धडाडीचा समाजनेता गवसला आहे. त्यांना उदंड आयुआरोग्य लाभो अशी मी सिंधुदुर्ग जिल्हा नाभिक संघटनेच्या वतीने प्रार्थना करतो. मा. दळेसाहेब , आप आगे बढो , हम सब आपके साथ हैं ।
©️ प्रवीण अशितोष कुबलसर ( 9881471684 )
No comments:
Post a Comment