माझी सगळी भाचरे चांगली आहेत. ते सर्व आम्हां भावंडांचा आदर्श ठेवतात. वाढदिवस दर वर्षांनी येत राहतात. पण दरवर्षीचा वाढदिवस आपल्या प्रत्येकासाठी अत्यंत महत्त्वाचा दिवस असतो. आपल्या आई बाबांना तो जन्मदिवस जास्त प्रकर्षाने आठवत असेल. कारण त्या दिवशी त्यांच्या झालेल्या तारांबळीची केवळ कल्पना केली तरी आज अंगावर काटा उभा राहतो. किती रोमांचक क्षण असतात ते !!!
बाळ जन्माला येइपर्यंतची ओढ आईला उल्हासित करत असताना तिला स्वतःला होणाऱ्या वेदनाही ती सुसह्य करुन घेते. आणि बाळाचा जन्म होतो.... एक सुकुमार बालक रडत जन्माला येते आणि सर्वांना हसवते. बाळाच्या आईच्या डोळ्यात हसू आणि आसू दोन्ही दाटून येतात.
आमच्या पिंटूच्या जन्माच्या वेळी अगदी तसेच झाले. पिंटू हे त्याचे टोपण नाव. मामांनी नाव ठेवण्याची पद्धत असल्यामुळे ' मराठी शब्दकोश ' वापरुन नवीन नाव शोधून काढले. त्यात ' प्रज्ज्वल ' हे नवीन नाव सापडले. या नावाचा अर्थही ' दीप तेवत ठेवणारा ' असा असल्यामुळे त्या नावावर शिक्कामोर्तब झाले. बाळाच्या तोंडात गोड पेढा भरवून ' प्रज्ज्वल ' असे उज्ज्वल नाव ठेवताना मी मामा म्हणून किती आनंदित झालो होतो म्हणून सांगू !!!
आज हा प्रज्ज्वल ' जिम बॉय ' झाला आहे. स्वभावाने शांत असलेला पिंटू त्याच्या अभ्यासात खूप हुशार आहे. हल्लीच त्याचं शिक्षण पूर्ण होऊन तो नोकरी करत आहे. नवीन तंत्रज्ञान त्याने आत्मसात केले आहे. नक्कीच त्याच्या अंगी असलेल्या गुणांचा , कौशल्यांचा त्याला पुढील आयुष्यात उपयोग होत जाईल. त्याने आमचा सतत आदर केला आहे. आमच्याकडूनच त्यांना काही विशेष सहकार्य घडत नाही. आमचे भाचे आमच्याकडून कोणतीही अपेक्षा ठेवत नाहीत हे विशेष.
पिंटूचा आज वाढदिवस आहे. तो आज आणखी एका वर्षाने मोठा झाला आहे. तो वयाने मोठा झालाच आहे पण मनानेही मोठा झाला आहे. त्याने नेहमी मोठे होत राहावे आणि आमच्या मनातील स्वप्ने पूर्ण करावीत. त्याला वाढदिवसाच्या अनेक उदंड शुभेच्छा.
©️ मोठे मामा
No comments:
Post a Comment