🔴 अहो! मुंग्यांनी मजला पिछाडीले

          उष्णतेचा पारा वाढला की यांचा सुळसुळाट सुरू! जिथे जावं तिथे या टोळक्यांनी धुमाकूळ घातलेला असतो. जरा काही गोडधोड ठेवलं की नाही, हे सैन्य तिथं हजर! आणि चुकून जरी यांच्यावर हल्ला करण्याचा विचार केला, तर यांचा दंश काय असतो, हे तुम्हाला चांगलंच ठाऊक असेल!

          लहानपणी, आमच्या मातीच्या घरात ढेकणांनी असाच कहर केला होता. माझी आजी बिचारी, एक-एक ढेकण चिरडून त्यांची वस्ती साफ करायची. त्यामुळे अख्ख्या भिंतींवर रक्ताचे डाग दिसत होते, जणू कोणीतरी संकल्पचित्र रेखाटलं होतं! रात्री झोपलो की हे ढेकूण अवतरणार. एकदा का तुमच्या अंथरुणात घुसले, की तुमची खैर नाही! तुम्ही गाढ झोपेत असताना, हे रक्तपिपासू हळूच बाहेर पडायचे आणि तुमच्या शरीरात त्यांच्या चाव्यांचं इंजेक्शन टोचायला सुरुवात करायचे. मग काय विचारता? झोप तर पार उडून जायची!

          आता या मुंग्यांचंही तसंच झालंय. पण या ढेकणांसारख्या फक्त रात्रीच्या ड्युटीवर नसतात, यांचा तर चोवीस तास कार्यक्रम सुरू असतो! साखर दिसली की लपून बसायच्या, गुळाच्या डब्यात घुसून घर करायच्या, तुमच्या गोड पदार्थांवर ताव मारायचा, हा तर यांना जन्मसिद्ध हक्कच वाटतो!

          सकाळी कचरापेटी उघडून बघा, यांची अख्खी फौज अगदी इमानदारीने कामाला लागलेली दिसेल. आणि ती कचरापेटी उचलून नेणाऱ्याला यांचा एक-दोन चाव्यांचा 'प्रसाद' मिळाल्याशिवाय राहात नाही. बरं, जर तुम्ही डोक्याला तेल लावत नसाल, तर ठीक आहे. नाहीतर त्या तेलावर ताव मारण्यासाठीसुद्धा यांची हजेरी ठरलेली! एकदा मला याचा अनुभव आला आहे, म्हणून सांगतोय, सांभाळून राहा!

          आणि यांचे प्रकार तरी किती! लाल मुंग्या, बारीक मुंग्या, डोंगळे, वळंजू (हा माणसांचा नाही, मुंग्यांचा प्रकार!), धावऱ्या मुंग्या, काळ्या मुंग्या, विषारी मुंग्या, चावऱ्या मुंग्या... हे तर मी शोधलेले काही प्रकार! तुमचे अनुभव याहून वेगळे असू शकतात, कारण तुम्हाला या मुंग्यांनी किती छळले आहे, यावर ते अवलंबून आहे. असो, हे मुंगीपुराण काही संपणारं नाहीये!

          परवा होळीला बायकोने मस्त पुरणपोळ्या बनवल्या होत्या. दुसऱ्या दिवशी त्या शिळ्या पुरणपोळ्या आणखी चविष्ट लागतात म्हणून डबा उघडला, तर काय आश्चर्य! त्या लाल मुंग्या आधीच तिथे पोहोचून माझी वाट बघत बसल्या होत्या! मी जसा घास घ्यायला गेलो, तशा त्यांनी माझ्या तोंडाचे लचके तोडले! एवढ्या चांगल्या पुरणपोळ्या मला त्यांनी शांतपणे खाऊ दिल्या तर शपथ! तुमचा तरी काय वेगळा अनुभव असेल, असं मला नाही वाटत!

©️ प्रवीण अशितोष कुबल सर